शीर्षक-यसोधरा
यसोधरा !
रुँदै अन्धकारले
शीत झारेपछी
उज्यालिदा रहेछन् दिनहरु
र त्यसरिनै उज्यालिरहेका रहेछन्
भगवानहरु, मान्छेहरु ।
यसोधरा !
तिमी त्यही अन्धकार बन्यौँ ,
भङ्ग गर्दै
मातृसुखको असिम आनन्दलाई
थोपरेरे तिम्रो छातीमाथी
वियोगका आँसु र अनुत्तरित कैयन
प्रश्नहरु
डुबाएर चुर्लुम्म
दुखको गहिरो सागरमा
दुखकै निर्वाण खातिर निस्किए
पिता र पतिको कर्तव्य देखि बिमुख
तिम्रो अर्धाङ्ग
र कहलिए महामानव
तर तिमी त यसै विलायौ
जसरी बिलाए घामको पहिलो झुल्कोसँगै
कैयन शीतहरु ।
तिमी त यसै गुमनाम भयौ
जसरी गुमनाम भइरहेकाछन
बत्ती मुनिका समयहरु ।
यसोधरा !
इतिहास विचरी बनाउन उद्द्त छ
तिमी र तिमीजस्तै कैयन अनुहारहरुलाई
गोमा ,सती ,सीता,राधा,
वृन्दा,द्रौपदी , गान्धारी या
याे युगकी जसाेदाबैन
यस्ता अनगिन्ती पात्र र चरित्रहरु
पटक पटक उभिरहन्छन्
कैयन प्रश्न बोकेर
मेरो मथिङ्गलमा
यो कुन ग्रहण हो?
को द्वारा सुनियोजित ?
जुन सधैं अर्धाङ्गिनीको
भागमा लागिरहन्छ !
र छोपीरहन्छ
विद्द्ता, स्वाभिमान र संघर्षका पाटाहरु
अनि व्याख्या गरिदिन्छ
पुरुष हैकमवादको अस्त्रको रुपमा
कहिलेसम्म सुर्योदय हुँदैन हाम्रा यात्राहरुमा ?
यसोधरा !
नसकौँला उत्खनन गरेर बदल्न
ती इतिहास ,ती मिथक
तर सक्छौँ हाम्रो वर्तमान
र आगत बदल्न
चारै युगमा नउघ्रेको पुरुषसत्ताको पर्दा
धुजाधुजा बनाएर
सदियौँदेखिको यो ग्रहणका विरुद्ध
लेखिएका तर नभेटिएका
समानताका परिनिर्वाण खातिर
अब प्रब्रजित बनौँ
जप्दै
स्त्रीजन हिताय
स्त्रीजन सुखाय
स्त्री कल्याण ।
Comments
Post a Comment